Tag: Weihnochdn

Posted on by

Weihnochdn bei dä Omma unn Obba

Wii ich noch a glaas Mädla wor, hammä Weihnochdn immä bei dä Omma unn Obba gfeierd. An vierazwanzichsdn Denzembä hod mich dii Omma immer zu dä Kerch gebrachd, wo dii Fraa Bohl auf uns Kinnä aubassd hod. Sii hod fürglasn unn mä ham aa Basdlsochn gmachd.

Wiis dungl worn is hod dii Omma mich widdä abghold und wii mä in di Wohnung nei senn, do war a glaas lichdla in dä Schdum unn hinnä dii Dürgäser hod a Deggn ghängt. Ganz arch schdill mussd ich sei, denn sünst wär dös Griskindla weggflogn un äs had doch erscht an Baam schö mach gmüsd. Irchendwann hod mich dii Omma dann irchendwo hi gschiggd, weilsa irchendwos vägassn hod. In derra Zeid is dä Obba deng iich ämol aus dä Schdum raus, weil wii ich widdä nei komma bin, worn die Lichdä oo unn die Omma hod gsochd: iich glaub äs Griskindla is fäddich. Dös wor a dolla Sach unn ich mussd nei die Schdum renn, abbä do wor kei Griskindla merra dou. Abbä dä Baam wor dodal bund gschmüggd mid vill Glaskuchln unn Lamedda. Drunder ham Bäggla glechen – Gscheng für ölla dii do warn.

Dii Gschengla hamma ned gleich grichd. Ersch hob ich a Gadichtla aufsooch müssn oddä mid dä Flödn a Weihnachdsliedla schbilln müssn. Arch ofd ho iich einfach än Gnechd Rubrechd von Deodor Schdorm aufgsacht unn bei dii Liedla wor dös einfachsda “Schdille Nochd, Heilcha Nochd”.

Iich väsuch Euch ämol as Gadichdla von Deodor zu laas, abbä dös werd a archs Gmisch aus Frängisch unn Deudsch sei, weil mä müssn hold gereim unn dös is gor ned su einfach.

Gnechd Rubbrechd

Su unn dös war as Gedichdla … abbä fäddich semmer noch ned – weil iich moch dös scho arch lang nimmä. Edzd müssda nooch äs Lidla hör unn singa dürfda aa.

Schdille Nochd, Heilche Nochd (iich deng, dös lass iich ämol auf Deudsch).

Fäddich … unn dou hommä dann dii Bäggla aufmoch dürf. IIch hob dann mid mein Zeuch gschbilld unn die Goußn ham Schnauz gschbilld. Schbäder hob iich dann aa mid Kaddn gschbilld. Äs wor immä a schöna unn lusdichä Omnd.

Unn wie wors bei Euch? Doud ämol a weng wos aufschreib. Mä könna dös auf dii Webseidn von Verein schdell.

Image by 🌸♡💙♡🌸 Julita 🌸♡💙♡🌸 from Pixabay

Posted on by

Gnecht Rubbrechd (Theodor Storm)

Vo draußd, vom Wäldla do kumm iich har;
iich muss euch sooch, es weihnachd scho saar!
Übbäall auf die Dannaschbidsn
do doun goldna Lichdla blidsn,
unn dou drom ausm Himmlsdoor
schaugt mid großn Augn dös Griskindla voor.
Unn wii ich su gaah durch finsdän Dann,
dou rufds mich mid na helln Schdimma an:
“Gnechd Rubbrecht”, hods grufn, “aldä Gsell´,
nimm dii Bee in dii Händ unn renn arch schnell!
Dii Karzn fanga zu brenn oo,
äs Himmlsdoor is aufgedoo,
Dii Aldn unn dii Junga sulln nu
von dä Jachd von Lem ämol ruu,
unn morchn fliech iich nunder auf die Ern;
äs sull nämlich widdä Weihnochdn wern!”
Iich souch: “Ach du libbä Harr Grisd,
mei Wechla fast am End edzd isd;
iich sull nua noch in dii Schdod,
wus arch vill gudda Kinnä hod.”
“Hosd dei Säggla aa bei diä?”
Iich souch: “Dös Säggla dös is hiä;
wil Äpfla, Nüss unn Mandlkarn
assn frumma Kinnä garn.”
“Hosd dei Rudn aa bei diä?”
Iich souch: “Dii Rudn, dii is hiä;
abbä für die Kinner nuä dii schlachdn,
dii driffd sa aufs Deil, än rachdn!”
‘s Grisdkindla sooch dann: “Su is rachd;
na dann geh mid Godd, mei dreuer Gnachd!”
Vo draußd, vom Wäldla do kumm iich har;
iich muss euch sooch, es weihnachd scho saar!!
Nu sochd ämol, wii ich sa hiä dirnna find!
Senns guda Kind, senns schlachda Kind?

Iich muss noch a wend dro arwed, abbä dös werd scho 🙂

Übbäsedsd von dä deudsch Schbrooch in dii frängischa vo: Sabine Wanner

Image by Willgard Krause from Pixabay