Posted on

Cumpetizzione fotografica â Wikimedia Commons

Pe cchello ca sapimmo, chesta è ‘a primma cumpetizzione fotografica addó ‘e ffotografìe sarranno pubbrecate cu licenza Creative Commons CC-BY-SA 2.5.
‘E ffoto sarranno carrecate ncopp’ô sito ‘e Wikimedia Commons pe ‘e pputé ntegrà ‘int’a ll’ articule d”a Wikipedia e pe ll’ati prugiette Wikimedia ca so’ cu licenza libbera.

“Si parlasse chistu mare quanti ccose avess”a cuntà

Chisto è ‘o titolo ‘e na cumpetizzione ‘e fotografìa ca è organizzata ‘a ll’ associazzione Askole ‘e Majure. ‘O titolo vene ‘e na canzona ‘e Aniello Califano d”o 1914. ‘O tema essere nu stimulo a pparlà d”o mare, ‘int’a tutt”e significate d”e ssoje: chillo ‘e cristallo, chillo calmo, chillo tempestoso, nquinato, prufanato, ‘o mare ‘a ll’estate e ô vierno, chello ca ce cunta ‘e storie ‘e ogge, ‘e chello ca ce cunta ‘e storie ‘e na vota … ‘o lavoro, ‘a vacanza, ‘o juoco.

‘A documentazzione pe ppartecipà, ‘int’â lengua taliana, se pô scarrecà ncopp’ ô sito ‘e ll’associazzione Askole.

‘E ffoto ca sarranno pubbrecate ncopp’â Wikimedia Commons venarranno ausate pe ll’immagene d”o juorno d”a Wikipedia napulitana.

Autòre: Sabine Wanner
Revesiòne: Carmine Colacino

Licenzia: Attribution-NonCommercial-NoDerivs 3.0 Italy (CC BY-NC-ND 3.0 IT)

Pubbrecato p”a primma vota ncopp’a Positanonews.

Posted on

Primmo juoco pe computer ´int´â lengua piemontese

Freecol, na simulazzione d”o processo storeco ca purtaje â dichiarazzione ‘e nnipennenza ‘e na parte ‘e ll’Amèrica do Nord, è ‘o primmo juoco pe computer lucalizzato p”a lengua piemontese. ‘E jucature s’ hann”a preoccupà ‘e tutte ll’azzione ammenestrative e pulitiche ca ce vonno p’arrivà ô quateno d”o juoco.

‘A verzione 0.7.0 ‘int’â lengua piemontese se pubbrecaje ‘o 13 ‘e luglio 2007 cu ‘a speranza ca ati llengue reggionali ‘o pigliano comme asempio e ca, cu ‘o tempo, nce staranno sempe cchiù lucalizzazione ‘e stu juoco.

‘A lucalizzazione se facette ncopp’â Betawiki, ‘a piattaforma ca s’ausa pure p”a localizzazione d”o software Mediawiki.

Ata nfrómma:
*Articulo ngrese
*Articulo piemontese
*sito internet ‘e Freecol
*Betawiki (ngrese)<b

Autòre: Sabine Cretella
Revesiòne: Carmine Colacino

Licenzia: Attribution-NonCommercial-NoDerivs 3.0 Italy (CC BY-NC-ND 3.0 IT)

Pubbrecato p”a primma vota ncopp’a Positanonews.

Posted on

´A festa ´e Montepertuso a Positano

‘O 2 ‘e luglio è ‘a festa d”a Madonna ‘e Montepertuso e ce stanno perzone ca veneno ‘a tutto ‘o munno pe vvedé sta festa è uno d”e tre cientre ô munno ca teneno na muntagna bucata ncoppo. ‘E ffuoche ‘e miezanotte fanno arricurdà ‘a leggenda d”a Madonna ca vencette ô diavolo ‘int’a na cumpetizione addó venceva chi bucava ‘a muntagna pe primmo. ‘A scenografia, uneca ô munno, e ‘a partecipazzione popolare è overo straordinaria. Montepertuso è nu paese ‘int’a nu paese cu n’identità specifica d”a soja e n’atmosfera uneca, serena e quase nun cuntaminata d”o turismo ‘e massa. N’esperienza ca nun s’ha dda fa passà senza ‘a vedé. So sempe disponibbele autobus navetta e ce stanno pure quatto ristorante (Ritrovo, Donna Rosa, Scirocco e Tagliata) pe passà ‘a serata, e adoppo ncopp’ê tterrazze addó ‘o melone è ‘e casa. Tutte ‘e montepertusane d”o munno fanno tutto ‘o possibbele pe turnà e partecipà â festa ô duje ‘e luglio. E vedé ‘a gente ca s’incontra adoppo tantu tiempo è già na magia pe ssé stessa.

Autòre: Sabine Wanner
Revesiòne: Carmine Colacino

Licenzia: Attribution-NonCommercial-NoDerivs 3.0 Italy (CC BY-NC-ND 3.0 IT)

Pubbrecato p”a primma vota ncopp’a Positanonews.

Posted on

Italia: protestano ô senato pecché nun ce stanno gelate

Duje senature taliane, Rocco Buttiglione (UDC) e Albertina Soliani, (L’Ulivo), ll’8 ‘e giugno mannajeno na demanna ê questure d”o senato, a nomme pure ‘e tanti ati culleghe, pe avé ‘o gelato pure â bouvette d”o Senato d”a Repubbreca.

A demanna fuje curta e semprece:
«Parlammo pe vuje cu na demanna e migliurìa d”a qualità d”a vita ô Senato. Â buvette nun ce stanno gelate. Nuje penzammo ca fusse na cosa bbona ca ce fossero e simmo cierte ‘e nterpretà ‘a vuluntà ‘e tanta gente. Se pô pruvvedé? S’avessero apparà ‘e servizzie d”o Senato pe currisponnere ‘a ll’asiggenze d”a vita normale ‘e tutte ‘e juorne d”e perzone. Aspettanno na risposta ve salutammo cordialmente.»

‘E senatore questure ca hann’’a decidere ‘e accettà o ‘e annjà ‘a requesta (e si vene accettata hann’’a vedé a ca cunnizzione) songo Gianni Nieddu (L’Ulivo), Romano Comincioli (Forza Italia) e Helga Thaler Ausserhofer (Südtiroler Volkspartei).

Già â metà ‘e marzo ‘o presidente d”o Senato, Franco Marini, cuncedette ê senature ‘e poté ausà ‘a sala ‘e ll’atte parlamentarie p”o primmo corso pe ssommelier pe ssenature e a Montecitorio (addò ce sta ‘a Camera d”e Deputate) ‘a gente discutette d”e produtte agricole ‘e qualità cu ciertificato. E ‘e senature avévano pure addumannato e ricevuto d”e “semmane” addedecate ê specialità tipiche d”a gastronommia ‘e tutte ‘e reggione primma, e aroppo ‘e tutte ‘e pruvince.

Nutizzia ‘e:
*Wikinews

Traduzzione: Sabine Cretella
Revesiòne: Carmine Colacino

Posted on

Triato a Majure – ´A femmena e ´o mare

‘O 2 e ‘o 3 ‘e giugno 2007 ce fuje na rappresentazzione d”o labboratorio ‘e triato “Le Maschere” (‘E Mmascare) ncopp’ ô tema “La donna e il mare” (‘A femmena e ‘o mare). Fuje organizzata ‘a ll’associazione artisteca e culturale Atellana, pe descrivere ‘e diverze ruole d”e ffemmene ‘int’â storia d”o mediterraneo.

Ll’ attóre so’ gguaglione ca cu ll’aiuto ‘e perzone ca fanno ‘o triato professionalmente hanno mparato a rrecità. D”a realtà fino â mitologgia greca … tutt”e ccose presentate hanno fatto vedé ca ‘e gguaglione cu chist’anno ‘e struzzione triatrale so’ cresciute assaje.

Ce steva na parte ‘nparticulare ca trattava ‘a storia ‘e Majure e ca parlava d”o retrovamiento d”a statua ‘e S. Maria a Mare e ‘a storia d”a Madonna d”e Catenelle.

‘A statua ‘e S. Maria a Mare fuje truvata ô 1204. Fujeno ‘e marenare ca raccugliettero ‘a Madonna d”o funno d”o mare nzieme cu ‘o carreco ‘e na nave ca turnava ‘e Custantinopole e ca s’avett’ânnascunnere â spiaggia ‘e Majure pecché tanno ce steva na tempesta forte overo. Pe nun affunnà, tanti ccose s’avetter”a ggettà a mmare.

‘A Madonna d”e Catenelle nvece allicorda ‘a storia ‘e quanno Barbarossa, ca fuje ammiraglio ‘e Solimano II, venette a Majure cu ll’armata soja e pigliaje a tanta gente d”a città comme schiave e ‘e ppurtaje a Custantinopole. Nu gruppetto ‘e priggiuniere scappaje e quanno returnaje a Majure offrette ‘e ccatene â Madonna. Chesta Madonna d”e Catene ancora ogge tene ‘o puosto ‘int’â nicchia d”a soja e vene cunziderata ‘a patrona d”e piscature e d”e marenare.

Ata nfrumma ncopp’ô gruppo ‘e triato pe mo nun ce sta, è nu peccato, pecché fanno cose belle assaje.

Autòre: Sabine Wanner
Revesiòne: Carmine Colacino

Licenzia: Attribution-NonCommercial-NoDerivs 3.0 Italy (CC BY-NC-ND 3.0 IT)

Pubbrecato p”a primma vota ncopp’a Positanonews.

Posted on

Batman passa ´e vacanze d´´e soje ncopp´â Costa ´e Amalfi

Michael Keaton, ca fa ‘a parte ‘e Batman ‘int’ô film, e ca è pure canasciuto pe ati film comme “Herbie”, è juto a Praiano ‘int’a na villa d”e cchiú belle d”o paese, ‘a Villa Lilly, addó è ospite d”o Dott. Alfonso Costa. È venuto accumpagnato d”o figlio sujo, Sean. So’ state viste ‘int’ê bar, vestute aligante, e a Raviello addó hanno visitato ‘e giardine d”o Belvedere e ll’ Hôtel Caruso. Michael ha prenotato na suite p”a fine d”a staggione turisteca e quinni ha cunfermato ca ‘e VIP ammerecane cunziderano overo ‘a Costa ‘e Amalfi comme a nu posto preferito pe passà ‘e juorne ‘e vacanza e pe se reposà.

Autòre: Sabine Wanner
Revesiòne: Carmine Colacino

Licenzia: Attribution-NonCommercial-NoDerivs 3.0 Italy (CC BY-NC-ND 3.0 IT)

Pubbrecato p”a primma vota ncopp’a Positanonews.

Posted on

Nutizzie ´int´â lengua napulitana … ma pecché?

Chesta nun è a primma vota ca se penza ‘e scrivere ‘e nnutizzie ‘int’â lengua napulitana. Ll’ati vvote pe na raggione o pe n’ata ‘o prugetto se fermaje, nun sapimmo pecché. Sapimmo però ca ce sta tanta gente ca vulesse vedé sta lengua scritta. Ce sta tanta gente ‘int’ô munno ca parla napulitano e ca nun sape parlà ‘o ttaliano, pecché quanno ‘a famiglia d”a soja se ne jette via ‘e casa, tanno ‘o ttaliano nun era canosciuto e â casa parlavano sempe e sulamente napulitano.

È overo ca chesta lengua nun è maje stata na lengua ufficiale ‘e ll’ammenestrazzione púbbreca, ma chesto nun vô dicere niente. È na lengua ca tene na storia antica cu libbre e canzone pubbricate a ccummencià d”o 1500.

Vulessemo dà tre cose cu chesta sezzione ‘e nutizzie:

– ‘A possebbeletà pe tanta gente ‘e leggere ‘int’â lengua madre d”a loro.
– ‘A possebbeletà pe tanta gente ca parla napulitano tutte e juorne ‘e poté leggere ‘int’a chesta lengua e, nu juorno, ‘e la puté scrivere.
– Mantené ‘a lengua e ll’ausà pe raccuntà ‘e ccose ‘e tutte ‘e juorne e nun solo p”a litteratura.

Pe mmo simmo ddoje perzone ca se occupano ‘e chisti articule e ringrazzio assaje a Carmine ca curriegge chello ca io scrivo, pecché comme tante ‘e vuje già sanno ‘o nnapulitano nun è ‘a lengua mia.

Nisciuno è perfetto – pe cchesto, si vuje ca liggite canoscite ‘e rréole d”a lengua napulitana (comme è descritta ‘int’â grammateca “‘A lengua ‘e Pulecenella” ‘e Carlo Iandolo) e vedite quacche errore, pe piacere facitecelo sapé.

Se ve vene ‘o vulío ‘e scrivere pure vuje quacche ccosa, site ‘e bemmenute. Comme aggiu ditto: nisciuno pô sapé tuttecose, e si vuje scrivite deverzamente chesto nun segnifeca ca chello ca vulite dicere nun è bbuono o nun è nteressante.

Pe mmo ve salutammo e sperammo e nce vedè ampresso ccà n’ata vota.

Autòre: Sabine Wanner
Revesiòne: Carmine Colacino

Licenzia: Attribution-NonCommercial-NoDerivs 3.0 Italy (CC BY-NC-ND 3.0 IT)

Pubbrecato p”a primma vota ncopp’a Positanonews.