Stammo parlanno d”a Mmèsca Tradizzionale ‘e Fasule ‘e Tramunte, nu prudotto ca mmo vene curtevata ‘e ll’Azienda Agricola Biologica Monte di Grazia ca è già canasciuta p”o vino. Ll’azienda ha recuperato na quantetà piccerilla ‘e sti fasule e mo ha accumnenciato a ‘e ffà. So state vennute p”a primma vota ‘o 14 ‘e dicembre 2008. E ccà ve cuntammo ‘a storia:
Mèsca ‘e Fasule Tradizzionale ‘e Tramunte.
Na vota, ‘e cuntadine ‘e Tramunte curtevavano chesta mèsca ‘e fasule pe essere sicure ca nce stevano sempe bastante fasule pe pputé sfamà â fameglia.
Chesto pecché secunno ll’anno cierte specie ‘e fasule veneno meglio ca ll’ate. ‘E fasule veneno curtevate ncopp’â stessa terra d”e vvite pecché ‘a cunvivenza d”e ddoje chiante ammegliora â salute ‘e tutt’e ddoje. ‘A vite fa ombra e ‘o fasulo da sustanza â vite lascianno ll’azoto ‘int’â terra.
‘E nomme d”e fasule songo: Pallatiello, Janco, Niro, Borlottino, Riginiello, Tabacchiello, Marrò, Verdone, Viola.
Ogge ‘e cuntadine quase nun curtevano cchiú chesta mèsca.
Nuje cercammo ‘e tornà a ll’ ausanze ‘e na vota pecché chesta eccezzionale biodeverzetà ca tenimmo nun ha ddà scumparí e è obbreco nuosto ‘e ‘a lassà p’ ‘e ggenerazzione ca veneno.
Pe cchesto quanno ve gustate nu piatto ‘e chesti fasule allicurdateve ca state magnanno “nu pocurillo ‘e storia ‘e chistu paese: Tramunte.”
‘Int’â seduta d”o 14 ‘e ottovre 2008 ‘o Cunziglio Reggionale d”a Campania ha appruvato ‘o disegno ‘e legge ca era n’inizziativa pruvinciale e accusì mo ‘o napulitano è ufficialmiente na lengua pure a casa soja.
Ncopp’o liviello nternazzionale ‘o napulitano vene cunziderato na lengua già ‘e parecchio tiempo e finalmente pure a casa soja addeventa ufficiale: chillo ca d”o siècolo XV è stato scritto e ca pure ora vene parlato ‘int’â tante parte d”o Sud ‘e ll’Italia e fuori ‘e ll’Italia, comm per esempio ‘int’ê State Aunite e ll’Argentina, pe menzionà ddoje, è cunziderato lengua pure d”a reggione Campania. Tene nu granne patrimonio litterario e nce stanno sempe cchiù perzone ca cercano ‘e se riprennere attivamiente ‘a lengua d”a loro, nun solo pe parlà, ma ppure provano ‘e ‘a scrivere.
‘O provvedimiento ‘e legge vô pruteggere ‘a lengua e prommuovere ll’aducazzione p”a ausà pe mparà e scrivere.
Me sto chiedenno si chisto finalmente è ‘o inizzio addo’ ‘a gente inizzia ‘e collaborà pe creà materiale dedattico libbero, cuntenute libbere. Me sto chiedenno se vuje, care letture, mo inizziate ‘e penzà davvero ‘e partecipà ‘int’â tante prugiette pe mantenè chella che è ‘a vosta cultura e lengua. Me sto chiedenno se n’inizziativa comme p”o Piemonte, ‘e purtà laptop a prezze basse cu nterfaccia ‘int’â lengua locale int’ê scòle fosse na via ca si putisse ntraprennere pure p”a Campania. Learning Without Borders in Belgio face propeto chesto: purtà e laptop ca costano poco ‘int’ê scole cullaboranno cu ‘e autorità relative o si nun ce sta na risposta ‘e lloro pure cu gruppe autonome ca vonno ffà ‘a stessa ccosa.
‘E jonte p”o articulo origgenale ‘int’â llengua taliana e pe Learning Without Borders nce stanno abbascio.
Autòre: Sabine Emmy Eller Revesiòne: Chesto testo nun è stato currietto pe errure ‘e grammateca e ortografìa.
‘A scola ‘e pallone A.S.D. S.C. Gioventù Tramonti ’85 – scritta ô campionato ‘e pallone ‘e primma categuria – arapette ‘e scrizzione p”a staggione ‘e pallone 2008/2009 pe chille ca nascettero d”o 1992 ô 2003. ‘O primmo allenamento ‘e prova è lunnerí 6 ‘e ottovre 2008 ô Stadio Communale S. Felice â Frazzione Pietre ‘e Tramunte.
Uffrimmo: vestite, traspuorto cu ‘o pullmino, allenatore qualefecate, tessera FIGC cu assecurazzione, scrizzione ‘o campionato, calcetto, campo ‘e pallone, piscina, palestra, calciotto.
Stage: Napoli Calcio, Juve, Salernitana, Inter, Fiorentina
‘A scola ‘e pallone ‘e Tramunte realizzaje ‘e sogne ‘e: Raffaele Apicella (1993 Salernitana), Giuseppe Pisani (1994 Salernitana), Luigi Cuomo (1995 Salernitana), Patrizio Caso (2001 Avellino), Francesco Marrazzo (2003 Nocerina), Walter D’Amato (2005 Nocerina), Moreno Giordano (2005 Paganese), Federico Apicella (2006 Salernitana), Gabriele Schiavo (2007 Juventus), Michael Caso (2007 Juventus).
Pe cchiú nfròmma chiammate ‘o 339-5895547 e ‘o 328-1068886
Che cosa è succiesso? È nu taliano ‘a primma perzona ca vene cundannata p’avè scritto nu blog, pecché? pecché fuje cunziderato comme na perzona ca nun arrispetta â legge, nu “giurnale” ha ddà essere arregistrato presso ‘o tribunale e ‘o blog ‘e chella perzona nun ll’era. Chi era? Carlo Ruta nu giurnalista e stóreco.
Si vulite vedé ô blog d”o sujo, s’arape na paggena quase vacante cu dduje link, uno ca dice: “se vuò sapé addò è juto a ferní ‘o blog clicca ccà” e n’ato ca porta ô sitio ‘e Sicily News.
Chello ca fà nu poco penzà è perché s’ha dda ‘e arregistrà nu blog comme si fosse a nu juornale? Nce sta quaccheduno ca tene paura? ‘E che? Ca ‘a ggente dice ‘a soja? Nun aggiu maje letto chellu blog, pecché nun ‘o canuscevo e pecché nun tengo manco ‘o tiempo. Chello ca saccio è ca nce stevano parecchie articule pure ncopp’â storia. Pe mme è na dumanna generale ca nun tene niente a cche ffà cu chello ca n’ata perzona scrive. ‘E ‘o diritto ‘e tutte: tené n’opinione e ‘a fà sapé.
Putite leggere ‘e cchiú ncopp’a sta stòria ccà: http://tinyurl.com/google-ruta Aggiu fatto na ricerca ncopp’a google ca cuntiene jonte (=link) a articule ‘int’ô taliano.
Leggenno ‘int’o forum d”o Gambero Rosso nce sta na dumanna ‘e chi so ‘e megliore cinche vine nuove p”o futuro. ‘A ccosa assaje bella è ca nce sta pure nu vino d”a Campania, overo d”a Custiera Amalfitana: ‘o utente Francvino dice ca ‘o Monte di Grazia ca vene prodotto a Tramunte è uno ‘e cheste cinche vine e ca s’ha ddà assaggià pecché è assaje origgenale cumparato cu ll’ate vine.
‘O 24 ‘e frevaro Beppe Grillo fuje a Napule pe parlà ‘a ggente e pe ccercà “scusa” a tutta ‘a ggente d”a Campania. Pecché? Pecché Napule, ca na vota era na capitale ‘e ll’Evropa, mo vene trattata comme … nsomma … ‘o ssapite pure vuje.
Grillo parlaje d”a storia comme overo fuje e dicette ca chi po’ cagnà ‘e ccose simmo nuje sulamente … dicette ca nun ce sta niente ca nun è possibbele. Ca s’ha dda ausà ‘a lengua napulitana … nun ve pare na cosa streveza ca mo è quase n’anno ca ogne tante scrivimmo n’articulo ‘int’ô napulitano. E nun ve pare curiuso ca ce sta chi ‘e lliegge pure 3000 vote e quacche articulo pure quase 5000? Chesto ca vô dicere? Io penzo ca vô dicere ca ‘a gente vulesse ‘a lengua soja … vuje ca leggite, pure ‘a vulite, pecché si no nun stiveve ccà a leggere.
Accummenciate a scrivere … n’articulo p”o juornale, o macari quacche frase curta come ncopp’a nu blog, ‘o pputite fa ncopp’a http://nap.i-iter.org.
Faceva nu friddo terribbele; faceva ‘a neva e faceva scuro, era l’urdema sera ‘e ll’anno viecchio! Cu chillu friddo e ‘int’ô scuro na nennella cammenava p”a via senza nu cappullone e a pede nude. Quanno era asciuta d”a casa soja teneva chianelle, è overo; ma cheste nun servivano a niente. Erano grosse assaje, ‘a mamma soja l’aveve purtate primma ‘e essa, tanto grosse erano ca ‘e pperdette quanno avette passà currenno ‘a via pe nun fernì sotto a ddoje carrozze ca fujevano comme a pazze. Na chianella nun se truvaje cchiù e ll’ata s”a pigliaje nu scugnizzo ca fujette penzanno ca ‘a puteva ausà comme na cónnula ‘o journo quanno pure isso avesso avuto nu ninnillo.
E accusì cammenava ‘a nennella, poverella, cu ‘e piede scaveze e piccirille, russe e blu p”o tanto friddo. ‘Int’a nu viecchio mantesino teneva tante zorfanielle, e ‘int’â mmano ne teneva nu fascetiello. Nisciuno n’aveva accattato quaccheduno pe tutta ‘a jurnata, e manco nisciuno aveva rialato quacche spiccio â nennella. ‘A poverella cammenava chianu chianu e teneva fame e friddo assaje, se vedeva ca era triste assaje. ‘E sciocche ‘e neve ca scennevano d”o cielo se fremmavano ncopp’e capille luonghe e gialle soje chine ‘e buccole ntuorn’ô cuollo, ma essa nun penzava a chesta bellezza. ‘Int’ê feneste ‘e cannele luccecavano, e ce steva n’addore ‘e natrella arrustuta, pecché era ‘a sera ‘e ll’úrdemo ‘e ll’anno, sapite?; e a chesto essa sì ca ce penzava.
‘Int’a nu cantillo nfra ddoje case – una cchiú mmiezz’â via ‘e ll’ata – s’assettaje e se arrugnaje. Mettenno ‘e piede piccirille a sotto, ma ‘o friddo ‘o senteva ancora. Â casa nun puteva jí pecché teneva paura, nun aveva vennuto manco nu micciariello e nisciuno aveve penzato e ‘e rialà quacche spiccio. ‘O pate d”o sujo ll’avesse pigliata a mazzate, e â casa comonque pure faceva friddo, ce steva sulamente ‘o titto e ‘e senghetelle cchiú granne erano ammarrate cu piezze ‘e paglia.
‘O friddo assaje faceva che quase nun senteva cchiú ‘e mmanelle. Nu zulfariello puteva essere utele overo, si sulo puteva piglià nu zolfaniello d”o fascetiello p”o scerià ncopp’ô muro pe se scaurá ‘e ddete. Ne pigliaje uno e l’appicciaje. Comme schizziava e coceva! Teneva na sciamma cavera e chiara, comme na luce piccerella pe ttramente ca ce metteva ‘a mano ntuorno. Fuje na luce meravigliosa overo!
‘A nennella quase quase penzava ‘e sta assettata nfaccia a na stufa ‘e fierro cu pede âttone e na alzata sempe âttone. ‘O ffuoco abbruciava bello overo dint’â stufa e faceva nu calore bello assaje! – ‘A nennella allongaje pure ‘e pede pe ‘e scarfà – ma ‘a sciamma se stutaje e ‘a stufa sparette – steva assettata cu ‘a stecchetta abbruciata d”o zolfariello ‘int’â mano. N’appicciaje n’ato, bruciava e faceva luce e addó ‘a luce ferneva ncopp’ô muro, chisto addeventava comme a trasparente, e accussí essa puteva guardà p’attravierzo ô muro.
Ncopp’â tavola ce steva nu mesale luccicante janco comme ‘a neva, na papara arrustuta chjena ‘e prugne e mele! E chello che fuje ancora cchiú bello è ca ‘a papara zumpaje d”a tavula cammenanno ‘nterra cu na furchetta e nu curtiello mpizzate ncopp’ê rine, jeva diretta diretta verzo ‘a nennella quanno a ll’antrasatta ‘o zurfaniello se spegnette lassanno visibbele sulamente ‘o muro friddo.
N’appicciaje n’ato. Mo steva assettata sott’a n’arbero ‘e Natale che era assaje cchiú granne e aorno ‘e chillo che aveva visto primma attravierzo ‘a porta ‘e vetro d”o putecaro ricco. E tante migliare ‘e luce luccecavano e ncopp’ ‘e ffrasche e quatre colorate comme chille ca aornavano ‘a fenesta d”a puteca ‘a steveno a guardà.
‘A piccerilla steva aizanno ‘e ddoje mane pe ‘e ttuccà quanno ‘o zurfaniello se stutaje. ‘E lluce ‘e Natale muntavano sempe cchiú ncoppa tanno ca parevano comme a stelle d”o cielo. Na stella cadette abbascio lassanno na longa coda ‘e fuoco p”o cielo. “Quaccheduno sta morenno!” dicette ‘a nennella, pecché ‘a nonna d”a soja, ca fuje ll’uneca che ll’aveva voluta bbene e ca era muorta diceva sempe: “Quanno cade na stella n’anima va ô cielo addó sta Dio.” Appicciaje n’atu zorfaniello nfaccia ô muro, facette luce tutt’attuorno e ‘int’â luce d”o zorfaniello ce steva ‘a vecchia nonna, lucente, tennera e cu n’espressione ‘e affezione.
“Nonna!” chiammaje ‘a nennella. “Puortame cu tte! ‘O ssaccio ca pure tu te ne vaje quanno se stuta ‘o zurfaniello, comme ‘a stufa cavera, ll’arruosto e ll’arbero ‘e Natale ca erano tantu bbelle!” – ‘A nennella facette mpresso mpresso ‘a appiccià n’atu zorfaniello, pe fa rimmané a nonna, e po’ n’ato, e n’atu ancora, e ‘e zorfanielle facevano na luce ca era cchiú chiara d”a luce d”o juorno. ‘A nonna nun era maje stata accussí bella, accussí granne; pigliaje ‘a nennella ‘int’ê vracce e nzieme volarono p”o cielo felice e cuntente nun sentenno ‘o friddo o ‘a famma, nun c’era paura – erano vicino a Dio!
E ‘int’ô cantillo vicino ‘a casa a ll’ore fredde d”o matino steva assettata ‘a nennella cu ‘e melille russe e nu surriso ncopp’â vocca – era muorta cungelata a ll’urdema sera ‘e ll’anno viecchio. ‘A matina ‘e ll’anno nuovo accummenciava e faceva luce ncopp’â nennella muorta ca steva assettata lloco cu ‘e zolfarielle, nu fascetiello quase tutto abbruciato. Se dicette ca se vuleva scarfà. Nisciuno sapeva d”e ccose belle ca essa aveva visto, nisciuno maje penzaje ca essa aveva accummenciato ll’anno nuovo ‘int’ô splennore e ‘a priezza cu ‘a vecchia nonna.
Nce sta n’azzienda agrecola piccerella ncopp’a Tramunte ca face nu vino cu ll’uve ‘e chesti zzone. P”o vino russo: Tintore e Piedirosso, e p”o vino janco: Pepella, Ginestra e Bianca Tenera.
Chistu vino è speciale overo pecché nun ce stanno ati ccantine ca ausano ‘e stesse uve. ‘E pere so’ sseculare e ogge, comme pure anticamente, veneno multiplecate pe galatoie. Pe cchesto è nu tipo ‘e vite ca nun vene criata pe nzierto. Chesti cchiante songo sopravvissute ‘a fellossera, ca è n’inzetto, na bestia, ca fa murí ‘a vite magnannose ‘e rrareche. Pe ngrassà ‘o tterreno s’ausano sulamente tecniche tradizzionale e ‘o lletame.
Overo ‘o gusto ‘e stu vino nun se pô cumparà. E mo? site curiose? Tenite raggione … ‘e na cosa ‘e chelle ca s’hann”a canoscere. ‘E vvite seculare ‘e chesta varietà so’ qquase scumparse … si vvulite avé nu cuntatto cu Alfonso Arpino, ca face stu vino cu tanta passione, facitece sapé, ve ajutammo vulentiere.
Foto: na vite seculare ca face ll’uva p”o Monte ‘e Grazzja Russo (Monte di Grazia Rosso).
