‘O 24 ‘e frevaro Beppe Grillo fuje a Napule pe parlà ‘a ggente e pe ccercà “scusa” a tutta ‘a ggente d”a Campania. Pecché? Pecché Napule, ca na vota era na capitale ‘e ll’Evropa, mo vene trattata comme … nsomma … ‘o ssapite pure vuje.
Grillo parlaje d”a storia comme overo fuje e dicette ca chi po’ cagnà ‘e ccose simmo nuje sulamente … dicette ca nun ce sta niente ca nun è possibbele. Ca s’ha dda ausà ‘a lengua napulitana … nun ve pare na cosa streveza ca mo è quase n’anno ca ogne tante scrivimmo n’articulo ‘int’ô napulitano. E nun ve pare curiuso ca ce sta chi ‘e lliegge pure 3000 vote e quacche articulo pure quase 5000? Chesto ca vô dicere? Io penzo ca vô dicere ca ‘a gente vulesse ‘a lengua soja … vuje ca leggite, pure ‘a vulite, pecché si no nun stiveve ccà a leggere.
Accummenciate a scrivere … n’articulo p”o juornale, o macari quacche frase curta come ncopp’a nu blog, ‘o pputite fa ncopp’a http://nap.i-iter.org.
Faceva nu friddo terribbele; faceva ‘a neva e faceva scuro, era l’urdema sera ‘e ll’anno viecchio! Cu chillu friddo e ‘int’ô scuro na nennella cammenava p”a via senza nu cappullone e a pede nude. Quanno era asciuta d”a casa soja teneva chianelle, è overo; ma cheste nun servivano a niente. Erano grosse assaje, ‘a mamma soja l’aveve purtate primma ‘e essa, tanto grosse erano ca ‘e pperdette quanno avette passà currenno ‘a via pe nun fernì sotto a ddoje carrozze ca fujevano comme a pazze. Na chianella nun se truvaje cchiù e ll’ata s”a pigliaje nu scugnizzo ca fujette penzanno ca ‘a puteva ausà comme na cónnula ‘o journo quanno pure isso avesso avuto nu ninnillo.
E accusì cammenava ‘a nennella, poverella, cu ‘e piede scaveze e piccirille, russe e blu p”o tanto friddo. ‘Int’a nu viecchio mantesino teneva tante zorfanielle, e ‘int’â mmano ne teneva nu fascetiello. Nisciuno n’aveva accattato quaccheduno pe tutta ‘a jurnata, e manco nisciuno aveva rialato quacche spiccio â nennella. ‘A poverella cammenava chianu chianu e teneva fame e friddo assaje, se vedeva ca era triste assaje. ‘E sciocche ‘e neve ca scennevano d”o cielo se fremmavano ncopp’e capille luonghe e gialle soje chine ‘e buccole ntuorn’ô cuollo, ma essa nun penzava a chesta bellezza. ‘Int’ê feneste ‘e cannele luccecavano, e ce steva n’addore ‘e natrella arrustuta, pecché era ‘a sera ‘e ll’úrdemo ‘e ll’anno, sapite?; e a chesto essa sì ca ce penzava.
‘Int’a nu cantillo nfra ddoje case – una cchiú mmiezz’â via ‘e ll’ata – s’assettaje e se arrugnaje. Mettenno ‘e piede piccirille a sotto, ma ‘o friddo ‘o senteva ancora. Â casa nun puteva jí pecché teneva paura, nun aveva vennuto manco nu micciariello e nisciuno aveve penzato e ‘e rialà quacche spiccio. ‘O pate d”o sujo ll’avesse pigliata a mazzate, e â casa comonque pure faceva friddo, ce steva sulamente ‘o titto e ‘e senghetelle cchiú granne erano ammarrate cu piezze ‘e paglia.
‘O friddo assaje faceva che quase nun senteva cchiú ‘e mmanelle. Nu zulfariello puteva essere utele overo, si sulo puteva piglià nu zolfaniello d”o fascetiello p”o scerià ncopp’ô muro pe se scaurá ‘e ddete. Ne pigliaje uno e l’appicciaje. Comme schizziava e coceva! Teneva na sciamma cavera e chiara, comme na luce piccerella pe ttramente ca ce metteva ‘a mano ntuorno. Fuje na luce meravigliosa overo!
‘A nennella quase quase penzava ‘e sta assettata nfaccia a na stufa ‘e fierro cu pede âttone e na alzata sempe âttone. ‘O ffuoco abbruciava bello overo dint’â stufa e faceva nu calore bello assaje! – ‘A nennella allongaje pure ‘e pede pe ‘e scarfà – ma ‘a sciamma se stutaje e ‘a stufa sparette – steva assettata cu ‘a stecchetta abbruciata d”o zolfariello ‘int’â mano. N’appicciaje n’ato, bruciava e faceva luce e addó ‘a luce ferneva ncopp’ô muro, chisto addeventava comme a trasparente, e accussí essa puteva guardà p’attravierzo ô muro.
Ncopp’â tavola ce steva nu mesale luccicante janco comme ‘a neva, na papara arrustuta chjena ‘e prugne e mele! E chello che fuje ancora cchiú bello è ca ‘a papara zumpaje d”a tavula cammenanno ‘nterra cu na furchetta e nu curtiello mpizzate ncopp’ê rine, jeva diretta diretta verzo ‘a nennella quanno a ll’antrasatta ‘o zurfaniello se spegnette lassanno visibbele sulamente ‘o muro friddo.
N’appicciaje n’ato. Mo steva assettata sott’a n’arbero ‘e Natale che era assaje cchiú granne e aorno ‘e chillo che aveva visto primma attravierzo ‘a porta ‘e vetro d”o putecaro ricco. E tante migliare ‘e luce luccecavano e ncopp’ ‘e ffrasche e quatre colorate comme chille ca aornavano ‘a fenesta d”a puteca ‘a steveno a guardà.
‘A piccerilla steva aizanno ‘e ddoje mane pe ‘e ttuccà quanno ‘o zurfaniello se stutaje. ‘E lluce ‘e Natale muntavano sempe cchiú ncoppa tanno ca parevano comme a stelle d”o cielo. Na stella cadette abbascio lassanno na longa coda ‘e fuoco p”o cielo. “Quaccheduno sta morenno!” dicette ‘a nennella, pecché ‘a nonna d”a soja, ca fuje ll’uneca che ll’aveva voluta bbene e ca era muorta diceva sempe: “Quanno cade na stella n’anima va ô cielo addó sta Dio.” Appicciaje n’atu zorfaniello nfaccia ô muro, facette luce tutt’attuorno e ‘int’â luce d”o zorfaniello ce steva ‘a vecchia nonna, lucente, tennera e cu n’espressione ‘e affezione.
“Nonna!” chiammaje ‘a nennella. “Puortame cu tte! ‘O ssaccio ca pure tu te ne vaje quanno se stuta ‘o zurfaniello, comme ‘a stufa cavera, ll’arruosto e ll’arbero ‘e Natale ca erano tantu bbelle!” – ‘A nennella facette mpresso mpresso ‘a appiccià n’atu zorfaniello, pe fa rimmané a nonna, e po’ n’ato, e n’atu ancora, e ‘e zorfanielle facevano na luce ca era cchiú chiara d”a luce d”o juorno. ‘A nonna nun era maje stata accussí bella, accussí granne; pigliaje ‘a nennella ‘int’ê vracce e nzieme volarono p”o cielo felice e cuntente nun sentenno ‘o friddo o ‘a famma, nun c’era paura – erano vicino a Dio!
E ‘int’ô cantillo vicino ‘a casa a ll’ore fredde d”o matino steva assettata ‘a nennella cu ‘e melille russe e nu surriso ncopp’â vocca – era muorta cungelata a ll’urdema sera ‘e ll’anno viecchio. ‘A matina ‘e ll’anno nuovo accummenciava e faceva luce ncopp’â nennella muorta ca steva assettata lloco cu ‘e zolfarielle, nu fascetiello quase tutto abbruciato. Se dicette ca se vuleva scarfà. Nisciuno sapeva d”e ccose belle ca essa aveva visto, nisciuno maje penzaje ca essa aveva accummenciato ll’anno nuovo ‘int’ô splennore e ‘a priezza cu ‘a vecchia nonna.
Nce sta n’azzienda agrecola piccerella ncopp’a Tramunte ca face nu vino cu ll’uve ‘e chesti zzone. P”o vino russo: Tintore e Piedirosso, e p”o vino janco: Pepella, Ginestra e Bianca Tenera.
Chistu vino è speciale overo pecché nun ce stanno ati ccantine ca ausano ‘e stesse uve. ‘E pere so’ sseculare e ogge, comme pure anticamente, veneno multiplecate pe galatoie. Pe cchesto è nu tipo ‘e vite ca nun vene criata pe nzierto. Chesti cchiante songo sopravvissute ‘a fellossera, ca è n’inzetto, na bestia, ca fa murí ‘a vite magnannose ‘e rrareche. Pe ngrassà ‘o tterreno s’ausano sulamente tecniche tradizzionale e ‘o lletame.
Overo ‘o gusto ‘e stu vino nun se pô cumparà. E mo? site curiose? Tenite raggione … ‘e na cosa ‘e chelle ca s’hann”a canoscere. ‘E vvite seculare ‘e chesta varietà so’ qquase scumparse … si vvulite avé nu cuntatto cu Alfonso Arpino, ca face stu vino cu tanta passione, facitece sapé, ve ajutammo vulentiere.
Foto: na vite seculare ca face ll’uva p”o Monte ‘e Grazzja Russo (Monte di Grazia Rosso).
Duje senature taliane, Rocco Buttiglione (UDC) e Albertina Soliani, (L’Ulivo), ll’8 ‘e giugno mannajeno na demanna ê questure d”o senato, a nomme pure ‘e tanti ati culleghe, pe avé ‘o gelato pure â bouvette d”o Senato d”a Repubbreca.
A demanna fuje curta e semprece: «Parlammo pe vuje cu na demanna e migliurìa d”a qualità d”a vita ô Senato. Â buvette nun ce stanno gelate. Nuje penzammo ca fusse na cosa bbona ca ce fossero e simmo cierte ‘e nterpretà ‘a vuluntà ‘e tanta gente. Se pô pruvvedé? S’avessero apparà ‘e servizzie d”o Senato pe currisponnere ‘a ll’asiggenze d”a vita normale ‘e tutte ‘e juorne d”e perzone. Aspettanno na risposta ve salutammo cordialmente.»
‘E senatore questure ca hann’’a decidere ‘e accettà o ‘e annjà ‘a requesta (e si vene accettata hann’’a vedé a ca cunnizzione) songo Gianni Nieddu (L’Ulivo), Romano Comincioli (Forza Italia) e Helga Thaler Ausserhofer (Südtiroler Volkspartei).
Già â metà ‘e marzo ‘o presidente d”o Senato, Franco Marini, cuncedette ê senature ‘e poté ausà ‘a sala ‘e ll’atte parlamentarie p”o primmo corso pe ssommelier pe ssenature e a Montecitorio (addò ce sta ‘a Camera d”e Deputate) ‘a gente discutette d”e produtte agricole ‘e qualità cu ciertificato. E ‘e senature avévano pure addumannato e ricevuto d”e “semmane” addedecate ê specialità tipiche d”a gastronommia ‘e tutte ‘e reggione primma, e aroppo ‘e tutte ‘e pruvince.
‘O 2 e ‘o 3 ‘e giugno 2007 ce fuje na rappresentazzione d”o labboratorio ‘e triato “Le Maschere” (‘E Mmascare) ncopp’ ô tema “La donna e il mare” (‘A femmena e ‘o mare). Fuje organizzata ‘a ll’associazione artisteca e culturale Atellana, pe descrivere ‘e diverze ruole d”e ffemmene ‘int’â storia d”o mediterraneo.
Ll’ attóre so’ gguaglione ca cu ll’aiuto ‘e perzone ca fanno ‘o triato professionalmente hanno mparato a rrecità. D”a realtà fino â mitologgia greca … tutt”e ccose presentate hanno fatto vedé ca ‘e gguaglione cu chist’anno ‘e struzzione triatrale so’ cresciute assaje.
Ce steva na parte ‘nparticulare ca trattava ‘a storia ‘e Majure e ca parlava d”o retrovamiento d”a statua ‘e S. Maria a Mare e ‘a storia d”a Madonna d”e Catenelle.
‘A statua ‘e S. Maria a Mare fuje truvata ô 1204. Fujeno ‘e marenare ca raccugliettero ‘a Madonna d”o funno d”o mare nzieme cu ‘o carreco ‘e na nave ca turnava ‘e Custantinopole e ca s’avett’ânnascunnere â spiaggia ‘e Majure pecché tanno ce steva na tempesta forte overo. Pe nun affunnà, tanti ccose s’avetter”a ggettà a mmare.
‘A Madonna d”e Catenelle nvece allicorda ‘a storia ‘e quanno Barbarossa, ca fuje ammiraglio ‘e Solimano II, venette a Majure cu ll’armata soja e pigliaje a tanta gente d”a città comme schiave e ‘e ppurtaje a Custantinopole. Nu gruppetto ‘e priggiuniere scappaje e quanno returnaje a Majure offrette ‘e ccatene â Madonna. Chesta Madonna d”e Catene ancora ogge tene ‘o puosto ‘int’â nicchia d”a soja e vene cunziderata ‘a patrona d”e piscature e d”e marenare.
Ata nfrumma ncopp’ô gruppo ‘e triato pe mo nun ce sta, è nu peccato, pecché fanno cose belle assaje.
